.png)
Հիվանդությունների կանխարգելումը և վաղ շրջանում ախտորոշումն ու բուժումը դյուրին է դարձնում բժշկի աշխատանքը և, իհարկե, պացիենտին տալիս է լիարժեք առողջանալու մեծ հնարավորություն։ Այս հայտնի ճշմարտությունը բժշկության մեջ աքսիոմա է, իսկ հիվանդությունների վաղ հայտնաբերման և կանխարգելման համար անհրաժեշտ է համապատասխան ախտանիշների դեպքում դիմել մասնագետի։
«Միքայելյան» համալսարանական հիվանդանոցի Ուրոլոգիայի կլինիկայի բժիշկ-ուրոլոգ Արգիշտի Ստեփանյանը նշում է, որ ուրոլոգին պետք է դիմեն և տղամարդիկ, և կանայք հետևյալ ախտանշանների դեպքերում՝
- Միզարձակության ցանկացած խանգարումներ, մեզի գույնի և հոտի փոփոխություններ, արյունամիզություն էպիզոդներ,
- Միզուկից տարաբնույթ արտադրության առկայություն,
- Գոտկային հատվածում սուր, բութ և ճառագայթող ցավեր:
- Սեռական ֆունկցիայի խանգարումներ,
- Արական անպտղություն,
- Ցավ շեքում, ամորձիներում, փոշտի չափերի մեծացում,
- Արտաքին սեռական օրգանների փոփոխություններ,
- Ցավեր որովայնի ստորին հատվածում, միզապարկի ոչ լրիվ դատարկման զգացողություն, մեզի շիթի թուլացում,
- Ցավի և մրմռոցի զգացողություն միզելուց,
- Անմիզապահության երևույթներ,
- Պարտադիր սկրինգային հետազոտություններ 50 տարին լրացած տղամարդկանց մոտ, յուրաքանչյուր տարին մեկ անգամ` ՊՍԱ, սոնոգրաֆիա, ուրոֆլումետրիա։
«Հատուկ ուշադրություն եմ ուզում հրավիրել վերոնշյալ ախտանիշներից արյունամիզություն էպիզոդներին, քանի որ այդ ախտանիշները սովորաբար չեն ուղեկցվում ցավով և հաճախ չարորակ ուռուցքների առաջին, երբեմն միակ ախտանիշն են լինում։ Այդ իսկ պատճառով արյունամիզություն առաջին իսկ էպիզոդի դեպքում պետք է անհապաղ դիմել բժիշկ ուրոլոգին»,-ասում է բժիշկը՝ շեշտելով, որ քաղցկեղը դատավճիռ չէ, իսկ վաղ փուլերում ախտորոշումը, շատ մեծ հնարավորություն է տալիս լիարժեք առողջացման։
Առհասարակ ուրոլոգիական խնդիրներից խուսափելու, դրանք կանխարգելելու նպատակով բժիշկը խորհուրդ է տալիս զերծ մնալ վնասակար սովորություններից' մասնավորապես ծխելուց, ներկանյութերի և քիմիական նյութերի հետ աշխատելիս օգտագործել հնարավոր կանխարգելիչ միջոցները, վարել ակտիվ կենսակերպ, օգտագործել ճիշտ և բալանսավորված սնունդ և չզբաղվել ինքնաբուժությամբ։
